الموتسكل الصينى

و من غير ما اشوف قدامى من دموعى
كنت هخبط ف عربية بتعدى الطريق
كلاكس السواق و الشتيمة
فوقتنى
مسحت دموعى
و جريت
كل ما افكر انة باعنى بعد الحب دا كله
هتجنن
دموعى تدمع من تانى
اه يانى ...
ماصعبتش علية
اخص عليك يا محمد
تلات سنين بتوعدنى
نسيت كلامنا ف الشات على الفيس
و لا الموبيل
نسيت مقبلتنا ف الاتوبيس و على الكورنيش
بسببك كدبت على بابا
كنت بزوغ من الدرس علشانك
فاكر لما كنت مزنوق ف فلوس علشان الموتسكل الصينى اللى كان نفسك فية
و كدبت و قلت انى باخد درس وهمى و كنت باخد فلوسة و ادهالك تدفع بيها القسط
و كنت بحلم بكلامك اننا هنركب مع بعض و انا وراك
و تفسحنى
دموعى غططت عينى من تانى
مسحتها بقلبى المكسور
يوم ما قعدنا على الكورنيش و جبتلى البطاطا المشوية كنت عارف انى بحبها
قلت ساعتها: هغديكى و اعشيكى كل يوم بطاطا مشوية يا سوسن
رديت انا وقلت: و هتفضل تحبنى يا محمد
- طول العمر لحد ماموت يا سوسن هحبك
يومها زعلت منك لما جبت سيرة الموت
و قلتلك اوعى يا محمد انا مابحبش سيرتة
و النهاردة بتتصل و عوزنى ف مكنا اللى اتعودنا نتقابل فية علشان تقولى مفيش نصيب
و هنسيب بعض
و انا اتحايل عليك و ابوس اديك اوعى تسبنى انا من غيرك اموت
و انت ولا انت هنا ركبت الموتسكل الصينى و مشيت
سبتنى على الرصيف
و عيونى مليانة دموع القهره
دخلت البيت حاولت اجمد و مسحت دموعى
امى قاعده قاعدتها المعتاده ف الصالة بتلف صوابع محشى الكرنب
يا بت اقلعى و تعالى ساعدينى 
دماغى وجعانى
يابت تعالى
و نفضتلها و دموعى حاشتنى اتكلم
و جريت على اوضتى و اترميت على السرير
و انا لسة بتخيلك ف حضنى حاضنى و بتحبنى
اخص عليك يا محمد
(تمت)